« AnkstesnisTęsti »
And musike selfe is melodious
To rejoyce the yeres and comfort the brayne,
Sharping the wittes with sounde solacious,
Devoydyng bad thoughtes whiche dyd remayne,
It gladdeth the herte also well certayne;
Lengthe the lyfe with dulcet armony,
As is good recreacion after study.
She commaunded her mynstrelles right anone to play
Mamours the swete and the gentill daunce;
With La Bell Pucell, that was fayre and gaye,
She me recommaunded, with all pleasaunce,
To daunce true mesures without varyaunce.
O Lorde God! how glad than was I,
So for to daunce with my swete lady.
By her propre hande, soft as any sylke,
With due obeysaunce I dyd her then take;
Her skynne was white as whales bone or mylke.
My thought was ravysshed, I might not aslake
My brennynge hert, she the fyre dyd make;
These daunces truely musyke hath me tought
To lute or daunce, but it avayleth nought:
For the fyre kyndled, and waxed more and more,
The dauncynge blewe it, wyth her beaute clere,
My hert sekened and began to waxe sore;
A mynute vi. houres, and vi. houres a yere
I thought it was, so hevy was my chere;
But yet for cover my great love aryght,
The outwarde countenaunce I made glad and light.
myne eyes should my hert bewray,
I toke my leve and to a temple wente,
And all alone I to my selfe dyd saye:
Alas! what fortune hath me hyther sente,
To devoyde my joye and my hert torment;
No man can tell howe great payne it is,
But yf he wyll fele it, as I do ywys.
Alas! O lady, how cruell arte thou,
Of pyteous doloure for to buylde a nest
my true hert, as thou dost ryght nowe! Yet of all ladyes I must love the best;
Thy beaute therto dyd me sure arest.
Alas, wyth love, whan that it doth the please, Thou mayest cease my care and my payne sone ease.
Alas! how sore maye I nowe bewayle
The pyteous chaunce whyche did me happe;
My ladyes lokes dyd me so assayle,
That sodaynly my herte was in a trap
By Venus caught, and wyth so sore a clap,
That through the greate stroke did perse:
Alas for wo I could not reverse!
Farewel all joye and al perfyte pleasure!
Fare wel my luste and my lykynge!
For wo is comen wyth me to endure;
Now must I lede my lyfe in mornynge;
I may not lute, or yet daunce or synge!
O! La Bel Pucel, my lady glorious;
You are the cause that I am so dolorous.
Alas! fayre lady, and myne owne swete herte,
Wyth my servyce I yelde me to your wyll,
You have me fettered; I may not asterte;
At your pleasure ye may me save or kyll;
Bicause I love you, wyl you me spyl?
Alas! it were a pyteous case in dede,
That you wyth deth should rewarde
A, a! that I am ryght wo bygone,
For I of love dare not to you speke,
For feare of nay, that may encrease my mone;
nay of you myght cause my herte to breke.
Alas! I wretche and yet unhappy peke
Into suche trouble, misery, and thought:
With sight of you I am into it brought.
And to my selfe as I made complainte,
I espyed a man ryght nere me beforne,
Whyche right anone dyd wyth me acquaynt.
Me thynke, he sayde, that ye are nere forlorne,
Wyth inwarde payne that your heart hath borne.
Be not to pensyfe; call to mynde agayne
How of one sorowe ye do now make twayne.
Myne inwarde sorowe ye begyn to double;
Go your waye, quod I, for ye can not me ayde.
Tell me, he sayde, the cause of my trouble,
And of my wo be nothynge afrayde.
Me thynke that sorowe hath you overlayde:
Dryve of no lenger, but tell me your mynde,
It may me happe a remedy to fynde.
A, a! quod I, it vayleth not your speche,
I wyll wyth you never have medlynge.
Let me alone, the most unhappy wretche
Of all the wretches that is yet lyvynge.
Suche is the chaunce of my bewaylyng;
Go on your waye, you are nothyng the better
To me to speke to make the sorowe gretur.
Forsoth, he sayd, remembre thynges thre;
The fyrst is, that ye may sorowe longe
selfe or that ye ayeded be:
And secondly, in great paynes stronge,
To muse alone it myght turne you to wronge:
The thyrde is, it myght you wel ease truely
To tel your mynde to a frende ryght trusty.
It is a jewel of a frende of trust,
As at your nede to tell your secretenes
Of all your payne and fervent lust.
His counseyle soone may helpe and redres
Your payneful wo and mortall heavynes;
Alone is nought for to thynke and muse,
Therfore, good sonne,do me not refuse.
And syth that you are plunged all in thought,
Beware the pyt of dolorus dispayre;
So to complayne it vayleth you ryght nought.
It may so fortune ye love a lady fayre,
Whych to love you wyl nothyng repayre;
Or els ye have lost great londe or substaunce,
By fatall chaunge of fortunes ordinaunce.
Tell me the cause, though that it be so,
In cause you love I knowe it by experience,
It is a payne engendryng great wo,
And hard it is for to make resystence
Agaynst suche love of fervent vyolence.
The love is dredefull, but nevertheles
There is no sore nor yet no sykenes,
But there is a salve and remedy therfore;
So for your payne and your sorowe great
Councell is medicine, which may you restore
Unto your desyre wythout any let,
Yf ye wyll tell me where your herte is set.
In the chayre of sorowe no great doubt it is
To fynde a remedy for your payne, ywys.
A physycyen, truely, can lyttel descerne
Ony maner sekenes wythout syght of uryne;
No more can I by good councell you lerne
All suche wofull trouble for to determyne.
But yf you mekely wyl to me enclyne,
To tell the cause of your great hevynesse,
Of your inwarde trouble and woful sadnes.
Than I began with all my diligence
To here him speke so grounded on reason,
And in my minde did make advertence.
Howe it was holsome, in tribulation,
To save a good and a trewe companion;
For to know my sorow and woful grefe,
It myght me comforte and ryght wel relefe.